Frysepinn med strikkelyst

Eg er ein frysepinn som i lange tider har lidd under manglande strikkelyst. No hevar du kanskje eit augnebryn, er strikking SÅ viktig tenkjer du kanskje? For meg er strikking ein del av kvardagen, enn så rart det kanskje verkar for deg. Eg kan ikkje hugse at eg lærte å strikke, det har alltid vore der. Difor var det rart og uvant når strikkelysta forsvann i vår.  Borte vekk som ei sviske. Eg strikka pliktskuldeg ferdig ein genser til storesøster, men kjekt var det ikkje. I staden hekla eg. Det var halvkjekt, men tross alt bedre. Og sidan heklateppet var ei gåve til ei nydeleg lita babyjente var det ganske kjekt likevel.

No viser gradestokken at Kong Vinter har festa grepet, sjølv på det regnvåte vestland. Me har begge beina i frysepinnårstida. Og på mystisk vis, heilt brått kom strikkelysta tilbake. At den gjekk hand i hand med eksamenslesing er kanskje ikkje så rart. Det er nemleg i dei travlaste periodane at det kreative blømer. I morgon skal eg ha eksamen og på veg heim passerer eg strikkebutikken. Ganske sikkert kjem eg heim med ein pose full av garn og fornya strikkelyst. Det skal bli ei fryd.

Bileta er lånt frå www.sandnesgarn.no , min favoritt!

Eg tenkte å knuse til med eit megaprosjekt til meg sjølv. På tjukke pinnar riktignok. Enten kofte eller, hold deg fast: kjole. Litt drøyt? Kanskje.

Reklame

Read Full Post »

Slå-om-skjørt

Eg er heldig og får vere med i ein morosam syklubb med kjekke damer som deler symaskingleda! Sist gong sydde eg eit omslagsskjørt, eller slå-om-skjørt som storesøster kallar det. Skjørtet er storleik 122, litt romsleg til storesøster, men det går fint. Stoffet er frå lageret. Eg har innført midlertideg innkjøpsstopp av både stoff og garn her i huset. Det har lett for å hope seg opp, så no brukar eg av det eg allereie har. Jada, gode forsetter. Får sjå kor lenge dei held… Eg sydde linninga på skjørtet på opp-ned, dermed skråar linninga litt utover øverst i stadenfor innover. Det er til å gremmast over, men eg prøver å late som eg ikkje bryr meg.

Dei hageinteresserte kan sjå at ENDELEG blømer erteblomane. Eg sådde dei i pinsen og heile sommaren har eg kikke misunneleg bort på naboane sine blomsterflor i kassane. Men no, når august har blitt september og frostnettene ligg på lur, ja då blømer erteblomane.

Read Full Post »

Sommarsaum, andre kapittel

Eg fortset mine sommarsymaskinaktivitetar, denne gong i ganske ukjent terreng. Stoff med strekk  og ribbekant er ny og upløyd mark for meg, i allefall fram til no. Eg lærte nokre triks undervegs, som til dømes at det har stor betydning korleis ein klypper ribben (den blå kanten neders på beina på soldrakten til storesøster). Eg har ikkje anna å seie enn at det er knallkjekt å sy, men vanskeleg å fotografere sommarglade småjenter i nye klær.

Read Full Post »

Sommarklærsaum

Dersom ein har tenkt å sy sommarklær til ungane er det jo eit poeng å setje i gong før sommaren er over. Sjølv om kalenderen seier ein tredjedel ut i juli er det framleis mange jobbedagar igjen før me tar ferie, eg syns difor at eg slett ikkje er seint ute med å sy sommarklær til jentene. Stoff frå Stoff&Stil, mønster frå den herlege boka Sikk Sakk.

Linbukse med fine pynteband, str 6 år. Den fine toppen har eg ikkje sydd sjølv, men kjøpt på Zara.

Soldrakt med korte bein og rynka overdel. Denne var festeleg å sy kan du tru! Med elastisk undertrå var det kjempelett å få overdelen fin, berre til å sy i veg med vanleg sytråd som overtråd og ein strikk-tråd som undertrå, og vips! Rynka! Denne er størrelse 2 år og passa perfekfekt til lillesøster. Så, då ventar me på sola!

Read Full Post »

Ganske grei guttegenser

Eg har strikka ein ganske grei guttegenser, storleik eit halvt år pluss. Garnet ermjuk og god merinoull frå Drops. Mønsteret er henta frå den rikhaldige oppskriftsamlinga på www.garnstudio.no. Genialt at det ligg ute ein masse oppskrifter slik at ein kan forsyne seg fritt. Ikkje alt er like stilig, men særleg blandt babymønstra er det nå ein del fine mønster. Ein annan fordel med merinoull er at ein strikkar med pinne nr 4. For guttejakker til halvtårgamle karar betyr det at strikkinga går i ein fei. Raske prosjekt innimellom er ikkje å forakte.

Read Full Post »

Tanteteppe til tanteguten!

For nokre veker kom ein fortryllande sjønn gutt til verda. Me er blitt søskenbarn, onkel og tante for første gong. Alle gratulasjonar går til dei nybakte foreldrene! Hipp hurra!

Tanteteppet vart ferdig tidsnok, men berre såvidt. Det viste seg nemleg at dobbelt lag platevatt ikkje nødvendigvis er ein god idè. Det er tydelegvis å be om trøbbel. Sjølv med iherdig bruk av knappenåler, tråkletråd i metervis, sprettekniv og alt det tolmod som var å oppdrive viste det seg heilt umogleg å quilte teppet slik eg hadde i tankane. For meg er det ikkje så lett å skifte plan sånn i siste liten. Det er litt naturstridig rett og slett. Har ein laga seg ein plan, bør ein følge denne planen. Men, åkke som, eg måtte snu veg her og enda opp med å quilte for hand. Etter mange timar og såre fingertuppar kom ei moster på besøk. Ho er verkeleg sakkyndig i denne samanheng og kunne fortelje meg at det var ein overtransportør eg mangla. Så nå står overtransportør på handlelista, forhåpentlegvis innkjøpt før neste tantebarn melder sin ankomst.

Read Full Post »

Febersaum

Det er ikkje eg som har feber, det er det lillemor som har. Raude kinn og blanke auge gjorde at den planlagte helgeturen vart lagt på is. I staden fekk eg meg ei stund ved symaskina. Det resulterte i samansying av lappar til krabbeteppe. Mottakaren er ennå ikkje kommen, og kjem ikkje her i huset dersom nokon i farten skulle komme til å tru det. Stoffet er bestilt frå Fat Quarter Shop og kom i postkassar i løpet av eit par små dagar. Texas-Bergen er ikkje noko distanse å sutre over.

Morosame pusekattar og hoppande froskar

Artige ugler med eit litt undrande uttrykk

Det gjennstår å fore med dobbelt lag platevatt og finne eit passande bakstykke, så skal nok dette bli eit fint krabbeteppe.

Til slutt ei pen peon til dei som treng det i kveld. God helg!

Read Full Post »

Inspirasjon i kveld

I kveld tenkjer eg at snart, om ikkje lenge, berre nokre veker, DÅ skal eg sy! Då skal kreativiteten ut, og fram skal symaskin og trådsneller. Stoff og tøy i alle fargar skal omformast til dei kjekkaste puter, pledd, vesker og andre nyttige saker. Det første eg skal sy er heilt klart denne:

Bildet er lånt frå www.boligliv.dk ei kjempeinspirerande side både når det gjeld mat, hobby og interiør. Oppskrifta til apen finn du her. Hadde det ikkje vore for at eg allerede har eit festeleg sengeteppe skulle eg jammen heve meg rundt og sydd dette:

Bildet er lånt frå www.retrovilla.dk.

Om berre nokre veker er alt i boks og fleire års arbeid skal leverast inn og vurderast. Det er litt skummelt å tenke på at studietida snart er over. Difor trøystar eg meg med at om nokre veker, då skal eg sy!

Treng du meir inspirasjon kan du klikke deg inn her: http://www.inspirecompany.com/, mykje morosamt ein kan lage sjølv!

Read Full Post »